四川五日大暴走 GO!

飞越1500公里,我终于到达天堂!

记得大一嘅时候,我喺黄密宿舍做得最多嘅事就係睇相~~佢喺九寨沟影嘅相!湛蓝嘅湖水,靓到就好似PS出嚟嘅咁!完全唔可以用言语形容嘅美丽,好似唔属于人间嘅仙境!

一直以来,上网睇到嘅九寨图片~~亲戚去九寨返嚟嘅相~~可人喺九寨影嘅婚纱相~~每次睇完都暗暗决定:一定要去一次,亲眼望吓嗰片唔属于人间嘅湛蓝!

恨咗好耐,终于呢个月可以完我嘅四川梦了!

我哋嘅第一站係去黄龙~~因为之前去过云南嘅玉龙雪山,谂住大家海拔都係4900米,所以觉得应该冇问题!点知~~原来係我太天真了!之前上网查过黄龙嘅温度,上到去先知道原来比我想象中仲要冻!全靠其他团友借衫俾我哋~我哋呢两只贪靓鬼先冇冻亲!虽然可以坐缆车上去,但係由缆车到争艳池要行差唔多两公里嘎~~要睇靓景真係要付出代价!不过见到争艳池嘅一刹那~~真係咩都值得!奶蓝色同翠绿色嘅钙华池呈梯田状排列,大小不一,错落有致,池水波平如镜!我斋喺争艳池都影咗差唔多两个钟头嘅相,搞到后尾得返半粒钟落山~~嗰时仲谂住够啦(因为搭缆车上嚟先用咗3分钟之嘛)~~点知原来落山嘅缆车喺另外一个方向~~所以唯有硬着头皮冲落山啦!原本90分钟嘅路程我同晓琳45分钟就冲咗落去~~唉~~就咁赖嘢了!明知道喺海拔咁高嘅地方好容易有高原反应,亦都知道应该尽量行动缓慢~~不过真係冇时间啦!离开黄龙嘅时候都冇咩嘢,跟住坐车去九寨沟~~喺离九寨沟沟口仲有10分钟嘅时候,由于车内嘅呕声一直此起彼落(原来大家都差唔多,哈哈),再加上到咗九寨18弯,司机一路喺度扮拓海玩漂移~~我终于晚哲不保,成为全车最后一个呕吐者!唉~~真失礼!

第二日清晨,我哋就向四川之旅嘅第二站,亦都係本次旅游嘅重点站—九寨沟出发啦!哇~~再一次感受到我哋中国真係好多人呀!平时睇D相都係D靓景~~殊不知原来靓景嘅背后係咁人头汹涌嘎~~直头可以媲美我哋GZ嘅状元坊!睇嚟被九寨沟嘅美色吸引嘅人唔止我一个喎!九寨沟係一个发展得非常之成熟嘅旅游地区了,区内全部以环保车代步,总体分为三条线:树正沟,日则沟同埋则查洼沟!喺地图上三条线呈Y字型,由门口出发沿着树正沟向诺日朗中心出发~~首先见到嘅係宝镜岩,传说宝镜岩表面有12生肖,如果可以一眼就望到自己生肖嘎话全年都会有好运嘎~~虽然只得一分钟都唔够嘅时间(因为係坐车经过),但係我都可以一眼搵到嗰只肥肥白白嘅猪呀!由于有一整日时间喺九寨沟里面,所以我哋决定上午游日则沟,下午游则查洼沟!沟内嘅美景我实在唔识用文字嚟表达(省略三千字)~~唯有狂影特影啦~~哈哈!今次去四川一共影咗六百几张相,拣相嚟晒都拣到手软呀!

如果再有机会嚟四川,我一定会拣自由行,喺九寨沟住三晚~~因为九寨沟嘅美景得一日欣赏真係好唔够啊!今次四川之旅唯一嘅遗憾就係嚟得太早了~~我应该等多一个月~~等到树叶全部变成火红!

http://photo.163.com/photos/princessdorisfan/